Олоҥхо туһунан

Күндү ааҕааччы, эйиигин саҥа үүммүт 2019 сылынан итиитик-истиҥник эҕэрдэлиибин!

   Мин аатым Кутукова Алина, Хамаҕатта саха-француз лиссиэй үһүс кылааһыгар үөрэнэбин. Кылааспытыгар 14 оҕо бары  кыһаллан, иллээхтик-эйэлээхтик  үөрэнэбит.  Иккис чиэппэри биэс оҕо  наар туйгун сыананан түмүктээн олус үөрдүбүт.

     Оскуолаҕа киириэм иннинэ уһуйааҥҥа сылдьан чабырҕах үөрэтэн ааҕарым. Онтон оскуолаҕа маҥнайгы кылааска үөрэнэ сырыттахпына учууталым Матрена Васильевна олоҥхо ааҕарга дьарыктаабыта. Ол курдук Бэдьээлэ  «Дьырыбына Дьырылыатта Кыыс Бухатыыр»олоҥхоттон сир-ийэ айыллыытын туһунан быһа тардыыны үөрэтэн аахпытым. Онтон ыла элбэх кэнсиэргэ, күрэхтэргэ нэһилиэк фольклорнай бөлөҕөр киирэн кытынныбыт. Куруук бириистээх миэстэҕэ тиксэн үөрэбит. Итини таһынан оскуолабытыгар биир күн анаан олоҥхо күнэ буолар. Бары сахалыы таҥнан кэлэн үөрэнэбит, олоҥхо истэбит, кэпсэтэбит. Ону таһынан уруһуй, оҥоһук күрэҕэ буолбута.

    Быйыл улууска кыра кылаас кыргыттарын ортотугар “Дьырыбына Дьырылыатта” диэн күрэххэ кытынным. Манна 11 кыыс кытынна, хас да түһүмэххэ бары олус  үчүгэйдик талааннарын, сатабылларын көрдөрдүлэр. Сорох ыллыыр, чабыр5ахтыыр, хомуска оонньуур эбит. Мин олоҥхону ааҕарым олус туһалаата дии санаатым. Түмүккэ миэхэ “Сандаара Куо” диэн бэрт үчүгэй анал аат биэрдилэр.

    Кыһын, олоҥхо геройдарын куукуланан оҥоруу улуустааҕы күрэҕэр биһиги кылаас сорох ийэлэрэ оҕолорун кытта кытыннылар. К.Оросин оҕолорго анаан суруйбут  «Дьулуруйар Ньургун Боотур» кинигэтинэн барыта 5 куукуланы тигэн биһирэбил бириискэ тиксибиттэрэ.

    Инникитин мин өссө атын олоҥхону ааҕыам, билиэм дии саныыбын. Бу дьарыкпын сөбүлээтим, салгыы сайыннарыам.