Учуутал Күнүгэр дьоһун бэлэх

Алтынньы 5 күнүгэр Хамаҕатта саха-француз лиссиэйигэр дьоро киэһэ буолла. Ол курдук Арассыыйа култууратын Үтүөлээх үлэһитэ, СӨ үтүөлээх уонна норуотун артыыһа Алексей Прокопьевич Павлов салайааччылаах Үүнэр көлүөнэ тыйаатыра режиссёр Валентина Якимец туруоруутугар В.С.Яковлев – Далан “Дьикти саас” сэһэнинэн испэктээҕин таһааран көрдөрдө. Ол иннинэ лиссиэйбит оҕолоро уруоктар быыстарыгар Учуутал Күнүнэн тыыннаах доҕуһуоллаах эҕэрдэлэрин бэлэхтээбиттэрэ сонун көстүү буолла.

Аактабай саалабыт лыык курдук дьонунан туолла: ытыктабыллаах бэтэрээннэрбит, кырдьаҕастарбыт, олохтоохтор, учууталлар, төрөппүттэр, үөрэнээччилэр – бары испэктээх саҕаланарын долгуйа кэтэстибит.

Саҕаланыытыгар Алексей Прокопьевич эҕэрдэлээн баран, көрөөччүлэр быыстарыгар учуутала, оскуолатын дириэктэрэ, кинилэри физикаҕа үөрэппит Николай Дмитриевич Захаров, баарын этэн, мустубут дьону соһутта даҕаны, үөртэ даҕаны. Учуутал киһи олоҕор сүдү суолтатын кэпсээн туран, Махтал суругу уонна сэмэй бэлэҕи туттарда.

Испэхтээк биир тыынынан барда. Сэһэҥҥэ суруллубут хас биирдии көстүү бу илэ көстөн кэлэн көрөөччүнү долгутта. Артыыстар хас биирдии көстүү кэнниттэн ытыс тыаһынан эҕэрдэлэннилэр. Алексей Прокопьевич сүрүн дьоруой аатыттан кэпсиирэ сонуннук көһүннэ. Биидийэ, муусука туттуллан, көрөөччүнү сэргэхситтэ. Ордук кэрэхсэбиллээҕэ бэйэбит үөрэнээччилэрбит бу туруорууга кыттыбыттара буолла. Ол курдук 5-6 кылаас үөрэнээччилэрэ: Ноговицына Катя,  Белолюбская Дайаана, Бушуева Алина, Протопопова Клава, Зырянов Арылхан, Жирков Серёжа, Касьянов Саша - бийэньиэрдэр оруолларын бэрт дьоһуннаахтык толорон саалга мустубут дьону үөртүлэр.

Испэхтээк бүтүүтэ бэтэрээн учууталларбыт хаартыскалара улахан экраҥҥа көстөн, дохсун ытыс тыаһынан биһирэннэ. Түмүгэр Алексей Прокопьевич кыттыбыт оҕолорго, тэрийсибит С.А.Никитинаҕа, оҕо хамсааһынын салайааччытыгар,  махтанан уонна үйэ-саас тухары өйдөрүгэр хаалыа диэн этэн туран, туоһу сурук туттарда. Николай Дмитриевич Захаров харда тылы ылан, махталын биллэрдэ уонна Далан бу Хамаҕаттаҕа учууталлыы, дириэктэрдии сылдьыбытынан, сорох уобарастар биһигиттэн ылыллыбыттара буолуо диэн бэйэтин санаатын эттэ. Оннук да буолуон сөп. Василий Семенович Хатырыкка үлэлээбитэ эмиэ биллэр.

Лиссиэйбитигэр быйылгы үөрэх дьыла “Ааҕааччы Сылынан” биллэриллибитэ. Сылбыт бастакы дьоһун хардыыта оҥоһулунна.

Тэрээһин уопсай хаартыскаҕа түһүүнэн түмүктэннэ. Тыйаатыр режиссёра Валентина Якимец: “Күндү көрөөччүлэрбит сүрдээх истиҥник көрүстүлэр, сөбүлээтилэр. Бу артыыстар эрэ ситиһиилэрэ буолбакка, көрөөччү учууталга сүгүрүйүүтүн туоһута дии саныыбын уонна айымньы ааптарыгар, улууканнаах суруйааччыга Далаҥҥа ытыктабыл. Бу испэктээх “Учууталга сүгүрүйүү” диэн соруктаах туруоруллубута. Ол соругун бэҕэһээ ситэрдэ”, - диэн санаатын үллэһиннэ. Оттон биһиги оҕолорбут тыйаатыр кэрэ эйгэтигэр киирэн, хас биирдии түгэни кэрэхсээн, бу айымньыны сүрэхтэригэр чугастык ылыммыттара буолуо диэн эрэнэн туран, тыйаатыр сэргэх, айымньылаах кэллэктиибигэр улахан махталбытын тиэрдэбит.

 

 В.Н.Сивцев, саха тылын, литэрэтиирэтин, култууратын учуутала